Digital Newspaper of Nepal
| Tuesday, 19 February 2019

इजलासमा नबस्ने आठ न्यायाधीशको निर्णय

March 13, 2018

काठमाडौं । आफूहरूको सुझाव विपरित प्रधान न्यायाधीश गोपाल पराजुलीले न्याय सम्पादनबाट अलग हुन नमानेपछि सर्वोच्च अदालतका आठ जना न्यायाधीशले इजलास बहिष्कार गर्ने निर्णय गरेका छन्। आजका लागि तोकिएका कुनैपनि इजलासमा उनीहरु सहभागी भएनन्।

यसरी इजलास बहिष्कार गर्ने न्यायाधीशहरुमा हरिकृष्ण कार्की, सपना प्रधान मल्ल, आनन्द मोहन भट्टराई, ईश्वर खतिवडा, विश्वम्भरप्रसाद श्रेष्ठ, अनिलकुमार सिन्हा, दीपकराज जोशी र प्रकाशसिंह राउत छन्।

प्रधानन्यायाधीश गोपाल पराजुलीले मंगलबारका लागि ११ इजलास तोकेका थिए। इजलास बहिष्कार गरेका एक न्यायाधीशले सेतोपाटसँग भने ‘हामीले छलफल गरेरै निर्णय गरेका होउँ।’

सर्वोच्चमा सामान्यतस् बिहान ११ बजेपछि तोकिएको इजलासमा बहस सुरु हुन्छ। तर बिहानै देखि आठ न्यायाधीश इजलास गएका थिएनन्।

प्रधानन्यायाधीश पराजुलीको इजलास बहिष्कार गरेका न्यायाधीश चोलेन्द्रशमशेर जबराको भने आज इजलास तोकिएको थिएन।

बाँकी इजलासमा भने बहस जारी छ।

प्रधानन्याधीश पराजुलीसहित न्यायाधीशहरू तेजबहादुर केसी, ओमप्रकाश मिश्र र डम्बरबहादुर शाही, दीपककुमार कार्की र टंक मोक्तान, केदारप्रसाद चालिसे र सारदाप्रसाद घिमिरे, पुरुषोत्तम भण्डारी, मिरा खड्का र बमकुमार श्रेष्ठको इजलास बसिरहेको छ।