Digital Newspaper of Nepal
| Wednesday, 24 April 2019

१० बर्षमा अर्घाखाँचीलाई तरकारीमा आत्म निर्भर बनाइने

June 22, 2018

अर्घाखाँची । तरकारी जोन अर्घाखाँचीको अयोजनामा एक दिने आन्तरिक अवलोकन भ्रमण कार्यक्रम बुधबार सम्पन्न भएको छ । १० बर्षमा अर्घाखाँचीलाई तरकारीमा आत्म निर्भर बनाउंदै राष्ट्रको सम्रग विकासमा टेवा पुर्याउने लक्ष्यका साथ प्रधानमन्त्री कृषि आधुनिकिकरण परियोजनाको योजना कार्यान्वयन इकाई अन्तरगत स्थापित तरकारी जोन अर्घाखाँचीले संचालन गरेका उन्नत प्रबिधि प्रदर्शन स्थलहरुमा भ्रमण गरिएको हो ।

तरकारी जोन अर्घाखाँचीमा आवद्ध बिभिन्न कृषि समुहका प्रतिनिधि,संस्थाका पदाधिकारी र सन्चारकर्मीको सहभागिता रहेको भ्रमण टोलीले संस्थाले तोकेको उन्नत प्रबिधि प्रदर्शन स्थल मालारानी–५ बांगी, सन्धिखर्क–२ खोंचेखोला, सन्धिखर्कको मथुरामा अवलोकन गरेको आयोजकले जानाएको छ ।

यसका साथै जिल्लाका सफल र अगुवा कृषक घोंचेखोलाका गणेश बन्जाडे, किमडांडाका पुस्कर बन्जाडे र बिहारका देव बहादुर खड्काको तरकारी बारीमै पुगेर अवलोकन गरि ब्यावसायिक तरकारी खेती गर्ने शैली,खेती गर्दा अपनाउनुपर्ने बिभिन्न सतर्कताहरु लगायतका बिषयमा सहभागिहरुलाई स्वयम कृषकहरुबाटै प्रशिक्षण गराइएको छ ।

सो अवसरमा बोल्दै अगुवा कृषक गणेश बन्जाडेले आफुले २०४१ सालमा सरकारी जागिर छाडेर ब्यावसायिक तरकारी खेतीमा लागेको,हाल ३२ रोपनी जग्गामा तरकारी खेती गर्दै आएको,बार्षिक २० देखी २५ लाख रुपैयां सम्म सबै खर्च कटाएर बचत गरेको सुनाउंदै योजना र साहसका साथ गरेमा कृषि पेशाबाट कोहीपनि फेल नहुने जिकिर गर्नुभएको छ ।

अर्का कृषक तथा जोन कार्यक्रमका सदस्य पुश्करनाथ बन्जाडेले पानीको अभाव रहेको सन्धिखर्क ८ किमडांडामा प्लाष्टिक पोखरीमा आकाशे पानी संगालेर तरकारी खेती गर्दै आएको र कृषि पेशाबाट आफु सन्तुष्ट रहेको भन्दै हिम्मत गरेमा कुनै पनि अभावले कृषि गर्न नरोकीने बताउनु भएको छ । यस्तै कार्यक्रममा बोल्दै तरकारी जोन अर्घाखाँचीका कार्यालय प्रमुख शकंर न्यौपानेले विदेशिएका नेपाली युवालाई स्वदेश फर्काउने योजनाका साथ ब्यावसायिक तरकारी खेती गर्न जिल्लावासीहरुलाई आग्रह गर्नुभएको छ ।

“अबको कृषि विदेशिएका युवालाई स्वदेश फर्काउने योजनामा अगाडि बढाउनुपर्दछ”,उहांले भन्नुभयो “ यसो गर्न सकेमा मात्रै मुलुकमा समृद्धि आउनेछ”जोनको कार्यक्रम अवधिमा अर्घाखाँचीलाई नमुना जिल्ला बनाउने लक्ष्य सुनाउंदै कार्यालय प्रमुख न्यौपानेले सांच्चै परिवर्तनको निम्ती तरकारी पेशा अंगाल्ने कृषकलाई संस्थाको तर्फबाट हुने हर सहयोग प्रदान गर्ने आफु प्रतिबद्ध रहेको पनि बताउनुभएको छ । कार्यक्रममा तरकारी जोन अर्घाखाँचीका संयोजक राम बहादुर रायमाझी,सह–संयोजक सरोज भुसाल,सचिव बिष्णु भुसाल,पिताम्बर बन्जाडे लगायतले सहजीकरण गर्नुभएको थियो । तरकारी जोन अर्घाखाँचीले पहिलो चरणको कार्यक्रम अन्तरगत सन्धिखर्क नगरका १२ वटै वडा,छत्रदेवका ८ वटा वडा र मालारानी–५ वांगी गरि २१ वटा वडाको ५२४ हेक्टर जमिनमा कार्यक्रम संचालन गर्दै आएको छ ।